විවරණ

 Mr and Mrs Iyer

2002 වර්ෂයේදී අපර්ණා සෙන් විසින් රචනා කොට අධ්‍යක්ෂණය කරන ලද Mr and Mrs Iyer චිත්‍රපටිය ඉන්දියානු සිනමාව තුළ ඉතාම ජනප්‍රිය වු චිත්‍රපටයකි.අපර්ණා සෙන්ගේ දියණිය වන කොන්කෝනා සෙන් ෂර්මා විසින් මෙහි ප්‍රධාන චරිතය වන මීනක්ෂි අයියර් ගේ චරිතයට පණ පොවන අතර රාහුල් බොස් විසින් රාජා චෞද්රි ගේ චරිතයට පණ පොවනු ලබයි.මුස්ලිම් විරෝධී වාර්ගික ප්‍රචණ්ඩත්වයේ පසුබිමට එරෙහිව සකස් කරන ලද සමකාලීන ආදර කතාවක් ලෙස මේ හැඳින් විය හැක.ඉන්දියානු වාර්ගික අර්බුදයට මැදි වුණු සංස්කෘතීන් දෙකක් වටා මෙම චිත්‍රපටය  නිර්මාණය ගොනු වී තිබේ .එනම් හින්දු භක්තිකයකු වන දමිළ බ්‍රහග්මන මීනක්ෂි අයියර් හා මුස්ලිම් වනජීවී ජායාරූප ශිල්පියෙකු වන රාජා චෞද්රි වටාය.මෙම චිත්‍රපටය මගින් ඉන්දියානු සමාජය තුළ පවතින ජනවාර්ගික ගැටුමේ ස්වභාවය හා ඉන් සමාජයට සිදුවන හානිය විවරණය කරනු ලබයි.ඊට අමතරව ආදරය,සෙනෙහස,ආත්මාර්ථකාමීත්වය හා පාවා දීම වැනි මනුෂ්‍ය ගති ලක්ෂණයන් මේ චිත්‍රපටය තුළින් මැනවින් විග්‍රහ කරයි.චිත්‍රපටයට දායක වන චරිත භාෂාමය  වශයෙන් විවිධාකාර වන බැවින් මෙහි ආඛ්‍යාන භාෂාව ලෙස ඉංග්‍රීසි භාෂා භාවිතා කරයි.

කල්කටාවේ සිට සිය පුතු සමඟ දෙමව්පියන් බැලීමට පැමිණි මීනක්ෂි නැවත කල්කටාව බලා යන අතර වාදයේ ඇතිවන සිද්ධි දාමය චිත්‍රපටිය පුරාවට නිරූපණය කරයි.චිත්‍රපටය ආරම්භ වන්නේ ඉන්දියාවේ කඳුකර ප්‍රදේශයක පිහිටි කුඩා බස නැවතුම්පොළකිනි.චිත්‍ර පටයේ ඇති  සුවිශේෂත්වය වන්නේ සීමිත පසුතල ප්‍රමාණයක නිර්මාණය වීමයි.ඉන් වැඩි කොටසක් රූප ගත වන්නේ බස් රථයක් හා දුම්රියක් තුළ ය.චිත්‍රපටයේ තීරණාත්මක අවස්ථාවන් රැසක් සිදුවන්නේද මෙම බස් රථය හා දුම්රිය කේන්ද්‍ර කර ගනිමිනි.කල්කටාව ගමනාන්තය කරගත් මෙම බස් රථය තුළට ගොඩ වන පුද්ගලයින් ඉන්දියානු සංස්කෘතිය විවිධ පැතිකඩයන් නිරූපණය කරයි.එනම් මුස්ලිම්,හින්දු,සික් ජාතිකයින් වේ.චිත්‍රපටිය ඉදිරියට ගොඩනැඟෙන්නේ මෙම පුද්ගලයින්ගේ විවිධ හැසිරීම් පදනම් කරගනිමිනි.

කඳුකරයේන් පිටතට යන අන්තරායික ගමනේදී මීනක්ෂි සිය දරුවා බලා ගැනීමට රාජාගෙන් උපකාර පතයි.රාජා සාම්ප්‍රදායික මුස්ලිම් තරුණයෙකුට වඩා ස්වරූපයෙන් වෙනස් වීම ම සාම්ප්‍රදායික හින්දු කාන්තාවක් වන මීනක්ෂි ඔහුගෙන් උපකාර පැතීම පැතීමට යොමු වීමට හේතු වේ.ඔවුන් දෙදෙනාගේ අන්‍යෝන්‍ය සම්බන්ධතාව ඇති වන්නේද මෙතැන් සිටය.නමුත් රාජා විසින් තම මුස්ලිම් අනන්‍යතාවයට ඇයට හෙළි නොකරයි.තම පුතු බලා ගැනීමට උපකාර කරන රාජා පිළිබදවත් පැහැදුනු සිතක් මීනක්ෂි තුළ ඇති වේ.එබැවින් ඔවුන්ගේ ආරම්භක සම්බන්ධය ඉතාමත් සිසිල් ස්වභාවයකින් යුක්තය.

චිත්‍රපටයේ ගමන්මග වෙනත් දිශාවකට යොමු වන්නේ වාර්ගික ප්‍රචණ්ඩත්වයෙන් පුපුරා ගිය නගරයක බස් රථය නතරවීමත් සමග ය.මේ අවස්ථාවේදී රාජා තම මුස්ලිම් අනන්‍යතාවය මීනක්ෂිට හෙළි කරයි.ඇය මින් කම්පනයට පත් වේ.ඇගේ කම්පනය තුළින් රාජා කෙරෙහි ඈ තුළ පැවති හැගීම් ප්‍රේක්ෂකයා වෙත මනාව විද්‍යාමාන වෙයි.බස් රථයට ගොඩ වන හින්දු අන්තවාදීන්ගේ මුස්ලිම්වරුන් සොයා යයි.එහි දී පුරුෂයින්ගේ චර්මඡේදනය වී ඇද්දැයි පවා පරික්ෂා කරයි.මෙහි දී මීනක්ෂි රාජා වෙනුවෙන් පෙනී සිටි.ඇය තම අතේ හුන් දරුවා රාජා ගේ ඇකයේ හිඳුවා ඇය අයියර් මහත්මිය බවත් රාජා තම ස්වාමිපුරුෂයා බව ප්‍රකාශ කරයි.මේ මොවුන්ගේ හමුවේ උච්චතම අවස්ථාවයි.

මෙම සිදුවීමෙන් පසු ව බස් රථයේ රැය පහන් කරන මොවුන් විකල්ප ප්‍රවාහන පහසුකම් සෙවීමට නගරයට යයි.මුස්ලිම් නිවාස විනාශ වී ඇති අතර ප්‍රදේශයේ පොලීසිය ජාතිවාදී කොල්ලය දෙස ඇස් පියා ගෙන සිටිති.රාජා සහ මීනක්ෂි ස්වාමිපුරුෂයා හා භාර්යාව ලෙස තම අනන්‍යතාවය පවත්වාගෙන දින කිහිපයක් නගරයෙන් පිට පාළු අමුත්තන්ගේ නිවසක රැකවරණය ලබයි.මෙම නිවසේ ගත කරන කාලය තුළ ඇති වන සිද්ධි දාමයන් හා දෙබස් තුළින් ඔවුන්ගේ සංස්කෘති දෙක අතර පවතින පරතරය විද්‍යාමාන වේ.ඔවුන් ආහාර පාන ලබා ගැනීමේදී පවා ගැටලු මතුවේ.නමුත් පසුව ඔවුන් අන්‍යෝන්‍ය වශයෙන් අවබෝධ කොටගනි.එතැන් සිට ඔවුන් සංස්කෘතීන් දෙක අතර පවතින පරතරයන් බිඳ දමමින් හුදු මනුෂ්‍යයන් ලෙස කටයුතු කරයි.

අවසානයේදී ඔවුන් ප්‍රදේශයේ දුම්රිය ප්‍රවාහනය ඔස්සේ තම ගමනාන්තය දක්වා ගමන් කරයි.දුම්රිය තුළ දී ඔවුන්ගේ ප්‍රේමාන්විත හැඟීම් තව දුරටත් උද්දීපනය වේ.නමුත් එය සීමා මායිම් වලින් එපිට තබා ගැනීමට දෙදෙනාම උත්සුක වේ.කල්කටාවට දුම්රිය ළඟාවීමේ දී අයියා මහතා මීනක්ෂි සහ තම පුතු සන්තානම් පිළිගැනීමට පැමිණේ.එහිදී මීනක්ෂි, තමාට උපකාර කළ මුස්ලිම් ජාතික තරුණයාව තම ස්වාමි පුරුෂයාට හඳුන්වා දෙයි.මෙ තැන් සිට මීනක්ෂි සහ රාජ අතර ප්‍රේමාන්විත වෙන් වීමක් සිදු වේ.මන්ද මීනක්ෂි ගේ සැබෑ අයිතිකරුවා ඔහු ඉදිරියේ සිටගෙන සිටි.මොවුන් දෙදෙනා අතරට තමා ගේ පැමිණීම වරදක් වන බව සිත යි.එබැවින් මොහු ඔවුන්ගේ ගමනේ ඡායාරූප අඩංගු කැමරා රෝලය මීනක්ෂි වෙත භාර දෙයි.එඑතැන් සිට ඔවුන් දෙදෙනාගේ චිත්තවේගීව සමුගනි.

සාම්ප්‍ම්ප්‍රදායික ප්‍රේම වෘතාන්තයකට වඩා වෙනස්ම වූ ආකාරයකින් යුක්ත ප්‍රේමයක් මෙම චිත්‍රපටය තුළින් විදහා දක්වයි.එකි ප්‍රේමයේ ඇති සොදුරු බව,අපූර්වත්වය විදහා ගැනීමට නම් මෙම චිත්‍රපටය නැරඹිය යුතු ම ය.